ప్రియమైన ప్రాక్టిషనర్లకు,

భగవాన్ శతజయంతి ఉత్సవాల సందర్భంగా ఈ పవిత్ర సంవత్సరంలో ముందుకు సాగుతున్న, మన హృదయాలు కృతజ్ఞతాభావంతో నిండిపోయాయి. భగవానునికి మనమందరం సమిష్టిగా సమర్పిస్తున్న శతజయంతి కానుకలో భాగంగా, తమ విలువైన అనుభవాలను, విజయవంతమైన చికిత్సా కేసులను, అలాగే సేవా శిబిరాల వివరాలను పంచుకున్న ప్రాక్టిషనర్లలందరికీ మా హృదయపూర్వక కృతజ్ఞతలు తెలియజేస్తున్నాము. మీ ప్రతి నిస్వార్థ సహకారం, స్వామివారు తమ వైబ్రియానిక్స్ సేవా ఉద్యమం కోసం ఆకాంక్షించిన ఐక్యతా భావాన్ని, అంకితభావాన్ని ప్రతిబింబిస్తోంది.

“మానవుడు సమాజము యొక్క సృష్టి. సమాజానికి చేసే సేవయే భగవంతునికి చేసే నిజమైన సేవ. అటువంటి సేవను కులం, మతం, జాతి లేదా దేశభేదాలను పరిగణనలోకి తీసుకోకుండా చేయాలి. అన్ని మతాల సారాంశం ఒక్కటే. అనేక విధాలుగా ఉపయోగపడే విద్యుత్ ప్రవాహం ఒక్కటే అయినట్లే, అన్ని మతాల సారాంశం కూడా ఒక్కటే. సమాజానికి సేవ చేస్తున్నప్పుడు సత్యం, ధర్మం, శాంతి, ప్రేమ అనే నాలుగు ఆదర్శాలను ఎల్లప్పుడూ మనస్సులో ఉంచుకోవాలి.” … శ్రీ సత్యసాయి బాబా జనవరి 1985, చెన్నై, https://saispeaks.sathyasai.org/discourse/seva-highest-sadhana

మా మూడు సంపాదక బృందాలు ఇప్పటివరకు అందిన విస్తృత సమాచారాన్ని పరిశీలించి, ప్రచురణకు అనువుగా తీర్చిదిద్దేందుకు అవిశ్రాంతంగా కృషి చేస్తున్నాయి. ఇంకా మీ వద్ద విశేషమైన చికిత్సా కేసులు లేదా విలువైన అనుభవాలు పంచుకోవడానికి ఉంటే, వాటిని మాకు పంపవలసిందిగా సాదరంగా ఆహ్వానిస్తున్నాము. ఈ దశలో అందిన ప్రతి సమాచారాన్ని ఈ ప్రత్యేక సంచికలో పొందుపరచడం సాధ్యం కాకపోవచ్చు. అయినప్పటికీ, మీ అమూల్యమైన రచనలు, అనుభవాలు రాబోయే వార్తాపత్రికలు మరియు ఇతర ప్రచురణలలో తప్పక స్థానం పొందుతాయని మేము హామీ ఇస్తున్నాము.

ప్రస్తుతం రూపొందుతున్న ఈ మూడు పుస్తకాలతో మా కృతజ్ఞతలు తెలపడం ముగిసిపోదు; అది 2026 సంవత్సరమంతటా, ఆ తరువాత కూడా నిరంతరంగా కొనసాగుతుంది. మనమందరం కలిసి ఈ సమిష్టి శతజయంతి సమర్పణను మరింత ప్రభావవంతంగా తీర్చిదిద్దుదాం. ఆ దిశగా మనం సాధించడానికి లక్ష్యంగా పెట్టుకోదగిన కొన్ని స్ఫూర్తిదాయకమైన లక్ష్యాలు ఇవి:

• 100 మంది కొత్త రోగులకు వ్యక్తిగతంగా ప్రాక్టిషనర్ సేవలందించడం • 100 కొత్త సేవా శిబిర కేంద్రాలను ఏర్పాటు చేయడం

• 100 అవగాహన కార్యక్రమాలను నిర్వహించడం • 100 కొత్త చికిత్సా కేసు వివరాలను నమోదు చేయడం

ప్రతి లక్ష్యాన్ని ముందుకు నడిపించడానికి ఒక అంకితభావం గల నాయకుడు అవసరం. ఈ మైలురాళ్లను విజయవంతంగా సాధించిన ప్రాక్టిషనర్లను లేదా ప్రాంతాలను మన వార్తాలేఖ ద్వారా గుర్తించి, సత్కరించడం మాకు ఎంతో ఆనందదాయకంగా ఉంటుంది. ఈ సమిష్టి లక్ష్యాల సాధనలో నూతన ఉత్సాహంతో కృషి చేయడానికి ఇది మనందరికీ స్ఫూర్తినివ్వాలని ఆకాంక్షిస్తున్నాము!

మన ప్రాక్టిషనర్ల సంఖ్యను పెంపొందించి, భారతదేశంలోని మారుమూల ప్రాంతాలకు సైతం వైబ్రియానిక్స్ సేవలను విస్తరించేందుకు మా విద్యా విభాగం కూడా అవిశ్రాంతంగా కృషి చేస్తోంది. ఈ లక్ష్య సాధనలో మరో ముందడుగుగా, ఈ మంగళకరమైన శతజయంతి సంవత్సరంలో స్వామివారికి వినమ్ర సమిష్టి సమర్పణగా “మీతో ఒకరిని తీసుకురండి (Bring Your Buddy)” అనే కార్యక్రమాన్ని ఆనందంతో ప్రారంభిస్తున్నాము. ప్రతి ప్రాక్టిషనర్ తన కుటుంబ సభ్యుల్లో ఒకరిని, స్నేహితుడిని, పొరుగువారిని లేదా రోగిని వైబ్రియానిక్స్ ప్రాక్టిషనర్గా తీర్చిదిద్దేందుకు ప్రేరేపించి, మానవసేవలో భాగస్వామి చేయాలని మనస్ఫూర్తిగా కోరుతున్నాము. అలాగే, గ్రామీణ మరియు మారుమూల ప్రాంతాలలో మన సేవలను మరింత బలోపేతం చేయడానికి, పుట్టపర్తిలోనే కాకుండా, గణనీయమైన భాగస్వామ్యం ఉన్న ప్రాంతీయ కేంద్రాలలో కూడా స్థానిక భాషల్లో శిక్షణా శిబిరాలను నిర్వహించాలని ప్రణాళిక రూపొందిస్తున్నాము.

ఈ కార్యక్రమానికి అనుగుణంగా, ప్రాంతీయ భాషలలో ప్రావీణ్యం కలిగిన స్వచ్ఛంద సేవకులను భారతీయ భాషలలో వైబ్రియానిక్స్ కోర్స్ మెటీరియల్ని మరియు వార్తాలేఖలను అనువదించడంలో భాగస్వాములు కావలసిందిగా ఆహ్వానిస్తున్నాము. ఈ మహోన్నత సేవా కార్యక్రమానికి అవసరమైన సంపూర్ణ శిక్షణను మరియు సాంకేతిక సహాయాన్ని మా సమాచార సాంకేతిక (IT) బృందం అందిస్తుంది.

మన ప్రయాణం నిరంతరం విస్తరిస్తూ, అభివృద్ధి చెందుతున్న నేపథ్యంలో, మన వార్తాలేఖను మరింత చైతన్యవంతంగా, అందరి భాగస్వామ్యంతో ముందుకు సాగే వేదికగా తీర్చిదిద్దాలనే సంకల్పంతో ఉన్నాము. ఇప్పటివరకు ప్రతి సంచికలో ఇద్దరు ప్రాక్టిషనర్ల పరిచయాన్ని అందిస్తున్న "2వ విభాగాన్ని" మరింత విస్తరించాలని ఒక విలువైన సూచన అందింది. ఇకపై, వ్యక్తిగతంగా లేదా బృందాలుగా ప్రాక్టిషనర్లు అందిస్తున్న విశిష్టమైన సేవా కార్యక్రమాల స్ఫూర్తిదాయక విశేషాలతో పాటు, సాంప్రదాయ చికిత్సా కేసుల రూపంలో పొందుపరచలేని వైబ్రియానిక్స్‌కు సంబంధించిన ఆలోచనలు, సమగ్ర ఆరోగ్యం (Holistic Health) పై అభిప్రాయాలు, స్వస్థతకు సంబంధించిన అనుభవాలను కూడా ఈ విభాగంలో చేర్చాలని భావిస్తున్నాము. ఈ విభాగాన్ని మరింత స్ఫూర్తిదాయకంగా తీర్చిదిద్దేందుకు మీ అమూల్యమైన ఆలోచనలు, రచనలు, అనుభవాలను సాదరంగా ఆహ్వానిస్తున్నాము. స్వామివారి దివ్య సంకల్పంలో ఐక్యంగా, చేయి చేయి కలిపి ముందుకు సాగుతూ, అవసరంలో ఉన్న ప్రతి ఇంటికీ, ప్రతి హృదయానికీ వైబ్రియానిక్స్ వెలుగును ప్రసరింపజేద్దాం!

“ప్రేమస్వరూపులారా! శరీరం జన్మించిన రోజుకే ప్రాధాన్యం ఇచ్చి, ఆ సందర్భాన్ని ఆడంబరంగా జరుపుకుంటూ స్వార్థ ప్రయోజనాలను నెరవేర్చుకోవద్దు. మీ హృదయాలలో నిర్మలమైన భావాలను వికసింపజేసి, మీ ఆలోచనలలో దైవతత్వంపై దృఢమైన విశ్వాసాన్ని స్థాపించి, ఇతరులకు సేవ చేయాలనే నిస్వార్థ ఉత్సాహాన్ని పెంపొందించుకున్న రోజే మీ నిజమైన జన్మదినంగా జరుపుకోవడానికి అర్హమైనది. సేవ ద్వారా భగవంతుని సర్వవ్యాపకత్వాన్ని అనుభవించగలరు... ఎక్కడ అవసరం ఉన్నా, ఎప్పుడు పిలుపు వచ్చినా, సేవ చేయాలనే అంతఃప్రేరణ మిమ్మల్ని అక్కడికి నడిపించి, ఎటువంటి సంశయం లేదా వెనుకంజ లేకుండా మీ సేవలను సమర్పించాలి.” … శ్రీ సత్యసాయి బాబా 23 నవంబరు 1984, ప్రశాంతి నిలయం, https://saispeaks.sathyasai.org/discourse/real-birthday.

స్వామివారి శతజయంతి మహోత్సవాలలో మీరందరూ ఆనందోత్సాహాలతో పాల్గొంటూ, “అందరినీ ప్రేమించండి – అందరికీ సేవ చేయండి” అనే ఆయన శాశ్వత సందేశానికి మరొకసారి మిమ్మల్ని మీరు అంకితం చేసుకోవాలని హృదయపూర్వకంగా ఆకాంక్షిస్తున్నాము.

సాయి సేవలో,

డా. జిత్ కె. అగర్వాల్